حس الموسيقا

هاي يا جماعه

رجعت انهاردا بعد غياب طوييييييييييييييييييييييييييييل دام اسبوعا كاملا بعيدا عن البلوج

مشاغل بقا والصحه وانتو عارفين ان في كليتنا الواحد ضهره ماشاء الله الاتب بقا
وسلسله الضهر تبوظ
بس انا فكرت ابيع سلسله ضهري قبل ماتبوظ لان انا اتزنقت في ارشين وانا استخسرت السلسله وممكن امشي ضهري بأنسيال مثلا السنه دي لحد مافك رهنيه السلسله و.... موضوع كبير كبير
المهم
هو موضوع انهاردا غالبا محدش حيفهمه او يكمله للاخر ممكن يفيد وممكن لا بس حاولو مش حتخسرو حاجه

بقالي اسبوعين تقريبا في اخر عشر دقايق من كل محاضره تشكيل اسمع د.صلاح هريدي يتكلم عن الموسيقا وعلاقتها بالعماره وكده يعني
انهاردا انا استفزتني كلمه قالها الدكتور والكلمه دي عششت في دماغي وباضت تلت بضات

قال لما واحد سأله حنعمل ايه بعد كده حنعرف نعبر ازاي عن الموسيقا بالعماره راح قايله ياخي حس الاول الموسيقا

الموسيقا فعلا تتحس مابتتسمعش
انا جايلكو انهاردا بصفتي دكتور في ماده حس الموسيقا

السؤال بقا هو ازاي تحس الموسيقا؟؟ او زي ماكان الموسيقار عمار الشريعي بيقول ازاي تشوف الموسيقا

انا يعني بقالي سبع سنين بعزف اورج وبعزف بأيد واحده وكمان هاوي ومعرفش اقرا نوته يعني من الاخر آلاتي جاهل(يعني حمارتك العارجه) بس بعد 6 سنين منهم وده لان انا هاوي لقيت نفسي لوحدي كده بسمع حاجات مش اي انسان عادي يحس بيها

مثلا اسمع صوت الكامنجا في الاغنيه والمغني بيغني احس حاجات الناس مش مستظرفاهه ومتعجبنيش حاجات الناس عشقاهه

احس بصوت الرق وممكن ادخل آلات بصوتي على الاغنيه اعملها توزيع مشخلع كده يعني

كل دي مهارات مكتسبه ومش ناس كتير اللي حساها

الاغنيه ونعتبرها عماره تنقسم لكذا دور وكل دور فيه شقتين او اكتر

تلاقي الكلمات تحت هي الاساسات ودي فعلا حوائط حامله لانها كلها شايله الحمل كله عليها وكل كلمه بتمثل طوبه في جدار الاغنيه
كل ماكان سمك الحيطه اكبر كل ماتستحمل ادوار اكتر
ولكن لو بدأنا الدور الاول بنص طوبه عمرنا ماحنوصل للسطح وحنقضيها في البدروم

الدور الاول الحان ودي اللي بتوصل الاحساس منغيرها الاحساس مقطوع والصوت مش مسموع والدور ده في شقتين نغمات وايقاعات

وعشان فيكو ناس مالهمش في الكلام ده يعني النغمات لما تكون قاعد ساعه العصريه وراجع من الكليه دخلت خدت الدش وقاعد في بلاكونه بيتكو قاعد بتشرب شاي والشاي اللي بتشربه عدلك مزاجك اوي وبدأت تغني دي نغمه فيها حاجات رخمه اوي التونات
مره بحكي لواحد صحبي على الربع تون فضل يألس ويقوللي ربع تونه وتمن تركي ونص بيضا وهاتك يا ضحك

تلاقي الاغنيه كانت ماشيه كويس مره واحده تلاقيها اتعوجت واتعوجت عوجه سوده وتبقا حلوه اوي لو مكملتش باقي الاغنيه بنفس العوجه
يعني تتعوج وتتعدل تاني
زي ما حج تامر ابن انكل حسني مابيقول في اغنيه الوحيده فهمتها غلط يا قلبي (واللوم) مش عليها
في الحته دي اسمع الاغنيه تاني حتلاقي ان اللوم دي بيقولها بنشاااااااااااااااااااااااااااااااااااااز جامد اوي

دي حاجه اسمها ربع تون التون الواحد 100 يبقا عشان اعمل الصوت النشاز ده يبقا اظبط عالتون 25
النص تون بقا ده لما تيجي تبص في البيانو تلاقي صوابع سوده هي دي نص تونات بس النص تون لما بيتظبط بيبقا فيه روح الربع تون

مش فاهمين طبعا انتو الكلام ده
مش مهم انا عايزكم تحسو بالتنشيزه اللي في اغنيه الوحيده وكل ماتسمعم تنشيزه كده تطبقوها بودنكم


ايقاع حجيبلكو من الاخر يعني عشان انا مش بديلكو النوته زي البلدي اللي احنا عارفينه والمصمودي و الشرح والايوب والاناضولي والصعيدي والفلاحي والوحده الكبيره وحاجات كتير تانيه غير الايقاعات الغربيه هي دي الريتمات

تاني دور صوت المطرب
ده مهم جدا لاداء اللحن والكلمات مش مهم يكون الصوت حلو المهم يكون مقبول بس مايبقاش وحش لان كده حتبقا الاغنيه مش مبلوعه خالص

زي مثلا في اغنيه كل يوم لتامر عاشور الاغنيه الاولنيه كان مغنيها وحشه اوي وصوته فيها طالع مسرسع ومش بينطق الجمل مظبوط
مع ان الاغنيه كلماتها روعه واللحن مؤثر جدا بس محسسنيش بيها بل انا مكنتش طايق الاغنيه كلها على بعضها كده

في النسخه المعدله للاغنيه اللي بيقولو عليها توزيع جديد هي توزيع لصوت المطرب مش للاغنيه يعني اللحن ثابت بس المطرب حسن من ادائه وبقا فيها الواد اللي مالوش حل والاغنيه فعلا وصلتني عشان اتقالت صح

بعض الناس بتفضل انها ترجع الاغنيه لورا لحظه تسجيلها يعني

الاغنيه بتتسجل ازاي؟؟؟
كل فرقه من الالات او كلها كا اوركيستر بتعزف الاغنيه عالمحاره كده منغير صوت مغني يادوب ايقاع بس
ويجي المغني يحط السماعات في ودنه ويسمع الايقاع كويس ويبدأ معاه او يدخل قبله حسب الاغنيه يعني

وصوت الموسيقا بتتحط في ملف وصوت المغني في ملف تاني خالص مش بيتسجلو مع بعض بعد كده بيجو ببرنامج زي ميكس كرافت يروحو دامجين الصوتين
في ناس بتفضل انها تسمع الموسيقا منغير صوت المغني ودي اسمها vocal
نفس فكره الكاريوكي
وناس بتفضل صوت المغني منغير موسيقا ودي اسمها accapella

دي كل انواع الموسيقا الملحوظه كلمات وتلحين ايقاع مغني توزيع

في ناس بتلاحظ ان اغاني كتير شبه بعض

ده سببه ايه بقا
ده سببه التوزيع
يعني مثلا الواد ابن خالتي اول ماسمع الليلادي عمرو دياب لقيته قارنها بأغنيه sway

مع ان مافيش اي وجه مقارنه بين الاغنيتين بس سبب مقارنته ليهم ان هما الاتنين متوزعين على تانجو بس sway
على تانجو خفيف والليلادي على تانجو صريح

في تشابه كمان لاحظته في اول اغنيه ضحكت عمرو دياب في الدخله هي هي نفس النغمه في اغنيه تامر حسني سيب الحب لناسه في الحته اللي بيقول فيها انتا قابلت المشعارف ايه دلوقتي اتعذب دوق

دي برده جايه من التوزيع يعني محدش سارق من حد حاجه

بس كفايه عليكو كده عشان انتو اكيد هيستو مني
بس ممكن تستفادو لو واحد مركز معايا يعني انا وصلتلكو جانب الموسيقا اربطوه انتو بجانب العماره

انا ربطلكو حبه مقاطع من اغاني بدال ماتعدو تدورو منها الكلاسيك والسريع والكلمات الكويسه والتوزيع الممتاز والكمانجات المستخبيه وحطيت مقاطع صوت منغير موسيقا عربي وانجليزي وطولت في الانجليزي اوي عشان بيبدعو فيها
هو طويل اه بس ركزو فيه يمكن تفهمو
واغاني كلنا عرفينها يعني كلها اغاني حديثه
الرابط اهه
http://ultrashare.net/hosting/fl/1694e90c9b
واللي عنده دايل اب ربنا يتولاه

Ms3a_miso