السبت، 19 يونيو 2010

انا مش قصير اوزعة .. انا طويل واهبل

عايز اقولهم حاجة..هما مين؟؟؟ هما بقا ..انا انسان .. بحلم وبعيش .. بوطي وابكي واعيط وارجع تاني وارفع راسي واطير..مابيقناش عيال لابسين طراطير...انا مش مع نظرية المؤامرة .. والعيال بتخدعنا وبيضحكو علينا ..والعيال عاملينلنا دوشة ..

اولا ..انا مش عيل .. انا واحد بفكر وليا كياني..واحد ممكن يطلع بطاقة انتخابية وبطاقة تموين .. واحد كان اهله وهو في سنة بيشتغلو وبيصرفو على اهلهم مش اهله اللي بيصرفو عليه..وان كان هو مابقاش زيهم عشان عايز يبقا حاجة تانية غيرهم .. فاليه مطلق الحرية .. اهلي وانا في سني كانو شايفين الكلية دي حاجة ثانوية " سيس كده " .. بس للاسف لحد وقت قريب كانت بالنسبالي حاجة رئيسة
حتى جاء قضاء الله .... " سفر المساحة " .. اللي اغلبكو سمعه مني
وانا متعمد اكتبه بالسين ..عشان هو فعلا زي الاسفار اللي غيرت حياة ملايين من البشر
جايز في اول الامر كنت " مشمئز"..ازاي انا اجيب سفر بقا بعد 14 سنة خدمة في ثانوية اجيب سفر؟؟؟؟؟
بعدين حاولت اهون الامر على نفسي مسترشدا بسفر المونديال اللي خدته مصر..بقا مصر امي تاخد سفر وانا لا ؟؟؟؟ مقدرش ازعل ست الحبايب..
بس هو خلاني ابص للدنيا بعين تانية .. عين اسمها الدنيا اصغر من البرغوت .. واي واحد ماشي على كوكبنا ونافخ نفسه حيكون اصغر من الدنيا الاصغر من البرغوت.. اي بنيآدم محصلته عندي بتساوي 0.... وفوقيها كلمة طظ
واللي سمع ايتماتي في راديو عالنت في الفترة دي من الزمن حيلاحظ نظرة استحكار المخلوقات في كلامي..
جايز الناس مابتحبش حد يستحقرها ..او ينتقضها وخصوصا لو كان حد اصغر منها.. بس عادي يعني .. كبرت عندي صغرت عندي
مش ذنبي اني اتولدت بعدك .. وكلنا ولاد 9 وااللي ابن 7 مش احسن ولا اسوء من ابن 9 في حاجة
وانا عندي الزبال اللي ماشي في الشارع مقامه بالنسبالي زي مقام احمد نظيف بالظبط .. يا عزيزي كلنا عرة

ممكن حد فيكو يكون مابيحبنيش "وانا مش بقصد حد بعينه " ..عادي يعني مش حبه ليا اللي حيدخلني الجنة ..
عايز تسمعني "قشدة " مش عايز اشطة بردو انا مضربتكش على ايدك
ناس كتير بردو بتشوفني هنا غير في الحقيقة .. بس مش لازم البس " ثوب الحكمة " طول مانا صاحي وطول مانا نايم
وناس شايفنني طالع فيها او عايز الفت نظر وخلاص .. بس يعني طظ في حضرتك انا بعبر عن نفسي بس .. لا عايز ابقى ولا عايز اكون.. انا عدم ممزوج فيه السكون
مش بحقر من نفسي... بس عادي يعني ..واحد وبيكتب وخلاص
ومش شرط ان كل كلمة بكتبها اكون مقتنع بيها او فيا اصلا هيا بتبقا ابداعات لحظة... يعني ممكن اتخيل اني انا سواق حنطور ومتجوز واحدة تخينة و وعندي منها 7 عيال " ربنا يخليهوملي" على الرغم اني لا سواق ولا عندي حنطور واصلا انا متعقد من اي حاجة بتمشي على اربع رجلين ومش متجوز واحدة طخينة ولا رفيعة بس "ربنا يخليلي السبع عيال بردو".. ممكن اكون واحد تاني بيكتب بأيدي .. او اكون كاتب في لحظة غضب عشان افضفض.. وناس كانت بتكلمني قاطعتني عشان كده
اكتشفت ان ال20 بتخبط عليا ..بس انا فتحتلها قبل الاوان
اعادة نظر في نفسي..انسان وليا كرامتي.. مش مجرد عيل بيدرس عشان يدور في ساقية الحياة
تك تك تك .. نقطة ومن اول السطر
Ms3a_miso

ليست هناك تعليقات: