الثلاثاء، 11 مارس 2008

على رأي المثل

هاااااي يا جماعه وحشتوووووووني جدا جدا اوي خالص مالص

انهاردا جاي كالعاده بموضوع مختلف وبغير جلدي ( خلص يا عم التعبان)

بما ان الحاجات دي مختفيه وانتهت من ايام ما الحج مينا ما وحد القطرين وعمل مربع ( ه ه ه خفه)

انهاردا موضوع الحلقه عن الامثال الشعبيه

1- جت الحزينه تفرح مالقلهاش مطرح (قال يعني الكراسي خلصت)

2-على وشك يبان يا مداغ اللبان(وانا اقول الابله كانت بتطردني ليه لما باكل مستيكه)

3- أرعه بتتعايق بشعر بنت اختها (هي المفروض ماتعملش كده هو المفروض تركب بروكه وتخلص نفسها)

4-ان كان حبيبك عسل ماتلحسوش كله(وان كان حبيبك سكر ماتحطهوش للنمل)

5-خدوهم بالصوت لايغلبوكم ( والصوت في اللغه العربيه يعني الكرباج يعني المثل ده بيقلك اللي يكلمك لسوعه)

6-أكل ومرعى وقله صنعه (وده طبعا ينطبق علينا.......)

7-ابو زنه يتمنى يخش الجنه (وام زنه مانفسهاش يعني ولا ايه خلي نفسيتك حلوه وخد ست ام زنه و زنه معاك)

8-امشي عدل يحتار عدوك فيك (وامشي عوج بالقبقاب يديك)

9-اطعم الفم تستحي العين ( انا مش فاهم ايه العلاقه واحد عايز عينه ماتستحيش يموت نفسه من الجوع؟)

10-ان كانلك عند الكلب حاجه قوله يا سيكي

11-ان خلص الفول انا مش مسئول(ده تقريبا المثل ده بيتقال على عربيه الفول كل يوم الصبح)

12-عيني في واقول اخي (يع)

13-من بره هلله هلله ومن جوه يعلم الله (والمثل ده بينطبق على كل حاجه في مصر والحمد لله)

14-قليل البخت يطلعله العضمه في الكرشة (والكرشه دي حاجه زي القلب والكبده وكده يعني مافيهاش عضم .... انا لسه حفهمك انتا روح المطعم واطلب واحد كرشه وانتا حتفهم) وانا كل ماقول المثل ده يحصلي مصيبه

15-يا مأمن الرجال يا مأمن الميه في الغربال (يا سلااااااام وانا زنبي ايه اذا كان الغربال مخروم)

16-اتلم المتعوس على خايب الرجا

17-اسأل مجرب ولا تسأل طبيب ( لو عيان وعايز تسأل مهندس أسأل انتا الخسران بدال مايعملك اشعه حيعملك بلان وسكشن)

18-اتكل عويس على مويس وضاعت البقره
(واضح ان عم عويس ساب البقره عن الحج مويس وكان الراجل رابطها بس البقره فكت الحبل ومشت بقا وعويس ده كان عنده عيال بقا ومعندوش في الدنا كلها غير ابنه والبقره موذوع كبير كبير....)

19-اجعل لك في كل بلد صديق (ويا سلام لو كانت صديقه)

20-يا داخل بين البصله وقشرتها ماينوبك الا ريحتها (مشيها ريحتها عشان خاطري)
21-الاعور على العميان باشا

22-زي المراكبيه يتخانقو على الحبل( وده ينطبق برده لحسن الحظ على كل حاجه في مصر يسيبو المركب و يتخانقو على الحبل و السمك ليه رب اسمه الكريم)

23-اربط الحمار مطرح مايقولك صاحبه

24-اللي مالوش شغله تشغله يفتح الباب ويقفله (منطبق علينا على اساس الفراغ اللي احنا فيه)

25-الدنيا زي الغازيه ترقص لكل واحد شويه ( زي ما قالت خالتي زكرى الله يرحمها بقا يوم ليك ويوم عليك مش كل يوم معاك) ياما نفسي تهزيلي على طول

26-اللي تعرف ديته اقتله
27-زي نجوم الليل تبرق ولا تنورش
28-اقرع ونزهي
29-
ان لقيت بلد تعبد العجل حش برسيم واديله
30-اكل فول واخرج قفايا عرض وطول ولا اكل كباب ولا وقفه الديانه ورا الباب(ودي تقريبا بتتقال اخر الشهر)
31- الام تعشش والاب يطفش ( احم احم مفهوم طبعا)
32-قد النمله وتعمل عمله
33-القد قد الفوله والحس حس الغوله
34-ربك يقطع من هنا ويوصل من هنا
35- احنا اللي دهنا الهوا( ماشي يا عم النقاش)
36-حبني وخد زعبوط قال هي المحبه بالنبوت (مسخره المثل ده)
37-الايد اللي تاخد ماتديش
38-جهنم مافيهاش مراوح

وبناسبه المراوح عمرو اديب قال دي (شغلو المروحه دي الارض مروحه)
39- المال السايب يعلم السرقه
40-العين بتعشق كتير والقلب له واحد
41- اللي انكسر ينصلح
42- قبل ماتقع الفاس في الراس وتيجي الطوبه في المعطوبه
43- يابخت مين وفق راسين في الحلال (دورولي على عروسه بقا)
44-حمارتك العارجه تغنيك عن سؤال اللئيم
45-من خرج من داره اتقل مقداره
46- اجري يابن ادم جري الوحوش غير رزقك لن تحوش
47- هديه القرفان لمونه( اعصر على نفسك لمونه )
48-خنفسه شافت ولادها عالحيط قالت ده لولي وملضوم في خيط
49-خراب يا دنيا عمار يا دماغي (تحيه لبشمهندس محمود عبد الواحد)
50-جبتك يا عبد المعين تعينني لقيتك يا عبد المعين عاوز تتعان

بس كفايه عليكو كده عشان شكلكو هنجتو قولولي رأيكم واي مثل انا مكتبتوش

بس خلاص

Ms3a_miso



هناك 4 تعليقات:

E$L@M H@$$@N يقول...

بجد زى العسل بس يا ميسو بس انت خنقتنى من مثل الكرشة كل شوية تقولة
D:

AHMED HOSNY يقول...

الله ينور يامسعى ومايهمكش من كلام crazy

E$L@M H@$$@N يقول...

ميسو عمرة مايزعل يا مطاعم حسنى
اتوصلى بالكفتة o.O

eman g يقول...

bravooooo